گەورەترین قاچاخچی پەنابەرانی ئەوروپا کە کوردێکی باشوری کوردستانە لە ئیستنابوڵ دەستگیركرا

Home / هەواڵ / گەورەترین قاچاخچی پەنابەرانی ئەوروپا کە کوردێکی باشوری کوردستانە لە ئیستنابوڵ دەستگیركرا

رۆژی چوارشەممەی رابردوو 29ی ئایار،  لە ئۆپەراسیۆنێکی هێزەکانی تورکیا بۆسەر قاچاخچییەکانی ئەو وڵاتە، یەکێک لە گەورە قاچاخچیەكان کە کوردی باشوری کوردستانەو پەنابەرانی لەتورکیاوە دەگواستەوە بۆ وڵاتانی ئەوروپا لەگەڵ 25 كەسی دیكەدا دەستگیركرا.

بەگوێرەی هەوالێکی ئاژانسی CNN Türk ،  لە ئۆپەراسیۆنێكی ژوری بەقاچاخبردنی پەنابەران و بەیاساغبردنی مرۆڤ لە بەڕێوەبەرایەتی پۆلیسی ئیستانبوڵ، بە هاوكاری لەگەڵ میتی ئیستانبوڵ و یەكەی پاراستنی كەناراوەكان لەو شارە، یەكێك لە گەورەترین قاچاخچیەكانی پەنابەران دەستگیرکرا، كە سەرۆكی تۆڕێكی گەورەی قاچاخچیەكانە.

بەپێی زانیارییەکان ئەو گەورە قاچاخچییە ناوی (ئـ.ع.ت)ە کوردەو خەڵكی باشوری كوردستانە ، کە سەرۆكی تۆڕێكی گەورەی قاچاخچیەكانە، کارییش گەیاندنی پەنابەران بووە لە رۆژهەڵاتی ناوەڕاستەوە بۆ ئەوروپا.

هەر لەو ئۆپەراسیۆنەدا کە لە چوار ناوچەی ئیستانبوڵ ئەنجامدران 25 تۆمەتباری دیکەش دەستگیرکراون، کە  ویستویانە لە رێگە ئاویەكانەوە بەرەو دەرەوەی توركیا هەڵبێن، بەڵام لەناو بەلەمەكەدا دەستگیرکراون.

بەپێی ئاژانسەکە لەكاتی پشكنینی بەلەمەكەشدا دەستیشگیراوە بەسەر بڕێك لە ماددەی هۆشبەردا، لەگەڵ بڕێكی زۆر لە دۆلاری ئەمریكی و یۆرۆدا كە بە رێگەی نایاسایی دەستیانكەوتوە.

ئەوەشخراوەتەڕوو، تۆمەتبارەکان لە ماوەی ساڵی رابردودا هەوڵیانداوە بە شێوەیەكی یاساغ 569 پەنابەر لە سنورەكان بپەڕێننەوە و لە چوارچێوەی پشكنینەكاندا توانراوە دەست بگیرێت بەسەر شەش ئۆتۆمبێل و شەش بەلەمدا كە ژمارەیەكی زۆر هێلەكی سەلامەتیان تێدابوە.

لە لێكۆڵینەوەكانیشدا دەركەوتوە، لە بەرامبەر كاری بە یاساغبردنی پەنابەران بۆ ئەوروپا، ئەو تۆمەتبارانە بۆ بە قاچاغبردنی هەر كەسێك، پێنج هەزار یۆرۆ-یان وەرگرتوە، بەو پێیەش ساڵانە نزیكەی دوو ملیۆن یۆرۆ-یان دەستكەوتوە.